شوية حقيقة

مفيش يا حبيبتى دوا للروح
لا فى مستشفى..
ولا فى أجزخانة..
ومفيش وطن
بيقبل الإهانة..
وبيتغير..
متأخر أوى
عرفت إن العمر مهما طال قصير..
وعرفت إيه معنى الخيانة..
لما بنسى روحى وافتكر
إن عربيتى محتاجة لصيانة..
لما بهرب من عيونك
من حيرة ولادى..
ومن سؤالهم..
ولما ببعد بعيد
وأنا جنب منهم..
لما بقبل إنى أكون
مجرد رقم فى الكشوف
واعمل نفسى مش شايف
وأنا ف الحقيقة
اللى مش عايز أشوف
ولما أعيش كده
كمالة عدد
أو سد خانة..